Сончогледовото масло го симна од тронот маслиновото масло во Шпанија бидејќи зголемените цени ги принудија потрошувачите да се свртат кон поевтини опции.
Во првата половина на 2024 година, Шпанците купиле 107 милиони литри маслиново масло и 179 милиони литри сончогледово масло, покажуваат податоците на Аниерак, најголемата шпанска асоцијација за флаширање маслиново масло.
До оваа година, маслиновото масло беше најпопуларно во шпанските домаќинства – покриваше 62 отсто од продажбата, а сончогледово речиси 34 отсто, покажуваат податоците на Министерството за земјоделство.
„Јасно е дека потрошувачката на маслиново масло во Шпанија опаѓа“, изјави портпаролот на здружението. „Има домаќинства што купувале само маслиново масло, а сега за прв пат купуваат и сончогледово и маслиново масло.
Во првите шест месеци од 2024 година, според Anierac, обемот на продажбата на маслиново масло е намален за 18 отсто, додека продажбата на сончогледово се зголемила за 25 отсто во споредба со истиот период во 2023 година, според официјалните податоци.
Ројтерс наведува дека, според официјалната статистика, едно литарско шише сончогледово масло во просек чини 1,86 евра, а маслиновото масло чини 6 евра или 50 отсто повеќе од 2022 година.
Шпанија е најголемиот светски производител на маслиново масло и покрива околу 40 отсто од испораките, но во последните две години горештините во пролетта и долготрајните суши го намалија производството, па цените се удвоија.
Ова доведе до тоа посиромашните луѓе да се префрлат од основната медитеранска кујна на поевтино сончогледово масло, според извештајот на шпанското Министерство за земјоделство „Трендови за потрошувачка на храна“ за 2023 година. Во извештајот се наведува дека на крајот на 2023 година, маслиновото масло главно го користеле домаќинствата од средната и високата средна класа.
Литар екстра девствено маслиново масло во некои шпански супермаркети чинеше дури 14,5 евра во 2023 година.
Иако цените малку се намалија оваа година, шпанската влада го намали данокот на додадена вредност на маслиновото масло во јуни за да го направи подостапно.
Годинава најголемиот шпански ланец на супермаркети Меркадона за да ги врати клиентите ја намали цената на маслиновото масло за 25 отсто и сега едно литарско шише чини помалку од седум евра.
