Данскиот производител на играчки Лего објави дека постигнал рекордни резултати во првата половина од 2025 година, со приходи од 34,6 милијарди дански круни (околу 4,64 милијарди евра), што претставува раст од 12 проценти во споредба со истиот период минатата година.
Оперативниот профит на Лего се зголеми за 10 проценти на годишно ниво на девет милијарди дански круни, или приближно 1,2 милијарди евра, објавува CNN.
Според извршниот директор Нилс Кристијансен, ова е „најдобрата прва половина од годината во историјата на компанијата“ – рекорд за приходи, оперативен профит и заработка.
Лего комплетите инспирирани од цвеќиња, собни растенија и Формула 1 беа многу барани, а компанијата профитираше и од новите соработки со анимираната серија „One Piece“ и детската програма „Bluey“.
Во првите шест месеци од оваа година, Лего лансираше рекордни 314 нови комплети и отвори 24 продавници низ целиот свет, вклучувајќи пазари како Кина и Индија каде што традиционално има мало присуство.
Кристијансен вели дека Лего ја проширува својата база на клиенти благодарение на производите што комбинираат забава и креативност со релаксација. Ботаничките комплети, како што се букети и собни растенија направени од коцки, станаа популарни кај новите корисници, додека компанијата истовремено успеа да се етаблира во дигиталниот простор преку соработка со компанијата Epic Games и нивната видео игра „Fortnite“.
Најавена е и повеќегодишна соработка со франшизата Pokémon, а првите Лего комплети инспирирани од овој феномен ќе се појават на пазарот следната година.
