Социјалната платформа Telegram планира од 12 јуни да лансира сопствена виртуелна валута Stars, со која корисниците ќе можат да плаќаат за купување во апликацијата, пренесува Комерсант, повикувајќи се на неколку Телеграм канали.
Писмото испратено од Telegram до програмерите на ботови покажува дека компанијата била принудена на овој чекор поради политиката на App Store на Apple, која не дозволува прифаќање плаќања без користење на внатрешниот механизам за купување на Apple.
Корисниците на Telegram сега ќе можат директно да вршат плаќања, што ќе ги намали трошоците за трансакциите на Apple и Google, пишува весникот.
Извршниот директор на Telegram, Павел Дуров, во априлското интервју со новинарот Такер Карлсон рече дека најголемиот притисок врз неговата платформа не го вршат владите, туку американските корпорации Apple и Google.
Според Дуров, Apple и Google постојано барале раководството на Telegram да се придржува до нивните политики.
