Околу 260.000 литри маслиново масло беа запленети во акцијата ОПСОН, чија цел беше криминални групи вклучени во препродажба на фалсификувана или расипана храна.
Во заедничка акција на италијанската и шпанската полиција уапсени се 11 лица, а Европол предупредува дека 260.000 запленети литри лажно маслиново масло биле рекламирани и продадени како вистинско – односно како „екстра девствено маслиново масло“.
Продажбата на лажно маслиново масло, предупредува Европол, стана вообичаена во земјите што произведуваат маслиново масло како Шпанија и Италија.
Утврдено е дека членовите на организираните криминални групи вклучени во измами со храна користат полоша варијанта на маслиново масло за да го разредат својот производ, пишува Вечерњи лист.
Не се препорачува да се консумира
Маслиновото масло „Лампанте“ се карактеризира со зголемена киселост, непожелен вкус и исклучително непријатен мирис, поради што не е погодно за консумирање.
Европол, исто така, појаснува дека терминот „лампанте“ произлегува од неговата историска употреба кога се користел како гориво во маслените светилки.
Според Европол, појавата на лажно маслиново масло е комбинација од различни околности, како што се инфлацијата, намаленото производство на маслиново масло, зголемената побарувачка…
Во рациите во Италија и Шпанија запленети се четири автомобили, 91.000 евра и разни документи.
Италијанските истражители пребарале три фабрики за маслиново масло во Сицилија и Тоскана, за кои се сомневале дека произведуваат лажно маслиново масло.
Од сопственикот побарале список на клиенти и документација, а земени се и мостри од маслиново масло. Една од тие компании е казнета поради неправилно означување на производот.
