Крипто кралот Сем Бенкмен – Фрид, момчето кое ја основа една од најголемите берзи за криптовалути FTX е прогласен за виновен дека дека во банкротот на компанијата проневерил 10 милијарди долари од клиенти и инвеститори. Рочиштето за изрекување на пресудата е закажано за 28 март 2024 година
Одлуката на поротниците дека 31 годишникот е виновен доаѓа по 15 дена сведочење и околу четири и пол часа размислување дали Сем Бенкмен-Фрид е виновен по седум точки од обвинението за измама и заговор.
Поротниците го отфрлија тврдењето на Банкмен-Фрид за време на сведочењето во федералниот суд на Менхетен дека тој никогаш не извршил измама и немал намера да ги измами клиентите на FTX, некогаш втората по големина крипто берза во светот, која пропадна пред една година.
„Г. Банкмен-Фрид. Ве молиме станете и соочете се со поротата“, кажа судијата Луис А. Каплан непосредно пред поротата седум пати да се изјасни „виновен“ по двете точки од обвинението за електронска измама, две точки за заговор за електронска измама и три други обвиненија за заговор, кои носат потенцијални казни до 110 години затвор. Но, Банкмен-Фрид најверојатно ќе се соочи со многу помалку од максимумот на изрекувањето на казната за 28 март.
Додека се читаше пресудата, Банкмен-Фрид изгледаше запрепастено, додека неговите адвокати останаа да седат покрај него. Кога седна, погледна надолу неколку минути. Неговиот адвокат Марк Коен подоцна пред медиумите изјави дека ја почитуваат одлуката на поротата, но дека се многу разочарани од резултатот. И покрај пресудата, остануваат на тврдењето дека е невин.
Американскиот обвинител Демијан Вилијамс, изјави дека Банкмен-Фрид извршил една од најголемите финансиски измами во американската историја, шема од повеќе милијарди долари која била створена само за да го направи крал на криптото.
„Индустријата за криптовалути можеби е нова. Играчите како Сем Бенкмен-Фрид можеби се нови. Но, овој вид на измама, овој вид на корупција е стар колку и времето и немаме трпение за тоа“, рече Вилијамс.
Тој посочи дека случајот треба да послужи како предупредување за секој друг измамник кој мисли дека е недопирлив, дека злосторствата му се премногу сложени, дека има премногу моќ за да биде гонет или може да се извлече од злосторствата, додавајќи дека ќе имаат „доволно лисици“ за сите.
Судењето привлече силен интерес со неговиот фокус на измама од размери што не се видени уште од гонењето на Бернард Медоф во 2009 година, чија пирамидална шема во текот на децении измами илјадници инвеститори од околу 20 милијарди долари. Медоф се изјасни за виновен и беше осуден на 150 години затвор, каде и почина во 2021 година.
