Прекините во сообраќајот низ Црвеното Море би можеле да ја дестабилизираат италијанската економија и да ги маргинализираат пристаништата во јужна Европа, предупреди во четвртокот италијанскиот министер за одбрана.
Јеменското движење Ансар Алах напаѓа бродови поврзани со Израел во Црвеното Море, барајќи прекин на израелските воени операции во палестинскиот Појас Газа и испорака на помош за Палестинците. Движењето е доминантна сила во советот што управува со најгусто населените делови на Јемен.
САД и Велика Британија возвратија со напади врз цели на движењето во Јемен, тврдејќи дека сакаат да обезбедат пловидба на важна сообраќајна рута за меѓународна трговија.
Логистичките компании ги пренасочија бродовите околу Кејп Добра надеж, по повисоки трошоци, а новата рута им помага на пристаништата во северна Европа, кои доживуваат силен раст на сообраќајот.
„Од геополитичка перспектива, ако вака продолжи, пристаништата на Средоземното Море би можеле да бидат маргинализирани“, изјави министерот за одбрана Гидо Крозето на членовите на парламентарните комисии за одбрана.
„Загрозена е безбедноста на навигацијата, но и економската стабилност (на Италија)“, тврди Крозето.
Според него, комерцијалниот сообраќај преку Суецкиот канал учествува со околу 40 отсто од вкупната италијанска поморска трговија, а до последната недела од минатата година потонал за 38 отсто. Времето на пловење е зголемено за 10 до 12 дена, а трошоците се зголемени речиси пет пати, наведе тој.
Во рамките на европската воена операција „Аспид“, Италија ја разгледува можноста да испрати авиони со задачи за надзор и собирање податоци во Црвеното Море, заедно со воен брод што ќе се снабдува во следните 12 месеци, рече министерот за одбрана.
