Кина најостро ги осуди изјавите на американскиот потпретседател Џеј Д.
Дополнително, следеа бројни потсетувања за селското потекло на Венс, односно дека тој самиот рекол дека неговото потекло е „селско“.
Според Индекс, минатиот четврток Венс ги бранеше тарифите на претседателот Доналд Трамп, кои ги потресоа пазарите и жестоко ја нападна „глобалистичката економија“.
„Што направи глобалистичката економија за Соединетите Држави? Тоа во основа се сведува на две работи – создавање огромен долг за да се купи она што другите земји го произведуваат за нас“, рече Венс.
„И да биде уште појасно – позајмуваме пари од кинески селани за да ги купиме производите што тие кинески селани ги произведуваат“, додаде Венс.
На редовна прес-конференција, портпаролот на кинеското Министерство за надворешни работи Лин Џијан рече: „Шокантно и тажно е да се слушнат такви неуки и омаловажувачки коментари од устата на американскиот потпретседател“.
Клиповите од интервјуто брзо се проширија низ кинескиот интернет, предизвикувајќи гнев и потсмев во земја каде што фабриките се повеќе користат роботи, градовите се префрлаат на домашни електрични возила, а дури и најоддалечените региони се поврзани со мрежа на брзи возови.
„Овој вистински „селанец“ од американската провинција очигледно не знае каде дошол“, напиша Ху Ксијин, поранешен главен уредник на државниот таблоид Глобал Тајмс, на микроблогот „Веибо“. „Многумина го покануваат да дојде и да се увери како изгледа модерна Кина.
Хаштагот на забелешките на Венс стана најпребаруваната тема на Веибо во понеделникот вечерта, а до вторник попладне собра повеќе од 140 милиони прегледи.
„Еве го неговото вистинско лице – ароганција и дрскост без граници“, гласи еден коментар кој собра речиси 3.000 лајкови.
„Можеби сме „селани“, но ја имаме најбрзата железница во светот, најдобрата логистика и сме лидери во вештачката интелигенција, автономното возење и беспилотните летала. Ако сме селани – горди сме на тоа!“ напиша друг корисник.
Голем број коментатори, исто така, укажаа на иронијата на зборовите на Венс, бидејќи тој самиот пораснал во сиромашно работничко семејство, што го опиша во неговите познати мемоари од 2016 година, „Хилбили елегија“.
Во книгата, Венс го раскажува своето детство обележано со сиромаштија, семејно насилство и зависност на мајка му, растејќи делумно во Апалачија – област која, според него, била целосно запоставена од американската елита.
Книгата стана хит по победата на Трамп во 2016 година, а многумина ја сфатија како објаснување зошто милијардерот доби силна поддршка меѓу белата работничка класа Америка.
