Шефицата на европската дипломатија, Каја Калас, изјави дека е незамисливо да се вратат руските средства замрзнати во рамките на Европската Унија поради војната во Украина без руска исплата на воени репарации.
„Не можеме ни да замислиме дека, доколку има примирје или мировен договор, тој имот ќе биде вратен во Русија без тие да платат репарации“, изјави Калас пред новинарите пред состанокот на министрите за надворешни работи на ЕУ во Копенхаген.
Според податоците на ЕУ, околу 210 милијарди евра руски средства се замрзнати во Унијата како дел од санкциите воведени врз Москва поради инвазијата на Украина.
Украина и некои членки на ЕУ, вклучувајќи ги Полска и балтичките земји, бараат конфискација на тој имот и негово користење за поддршка на Киев.
Но, најголемите членки на ЕУ, како што се Франција и Германија, како и Белгија, каде што се наоѓаат поголемиот дел од средствата, ги отфрлија ваквите предлози.
Тие истакнуваат дека Унијата веќе го наменила идниот профит од тој имот за враќање на помошта за Украина и го доведуваат во прашање постоењето на законска основа за конфискација.
Според дипломатите, дебатата сега се повеќе се фокусира на тоа како средствата би можеле да се користат по завршувањето на војната во Украина.
