Неколку индиски рафинерии се подготвуваат да го намалат увозот на руска нафта како одговор на притисокот од САД врз Њу Делхи да престане да купува руска сурова нафта за да помогне во завршувањето на војната во Украина, потврдија за Ројтерс три извори запознаени со ситуацијата.
Американскиот претседател Доналд Трамп вчера изјави дека индискиот премиер Нарендра Моди го уверил дека земјата ќе престане да купува нафта од Русија.
Индија денес изјави дека двете главни цели на земјата се да обезбеди стабилни цени на енергијата и безбедно снабдување.
САД ги удвоија царините за индиските стоки за да извршат притисок врз Њу Делхи да го намали увозот на руска нафта, а американските преговарачи рекоа дека ограничувањето на тие купувања би било клучно за намалување на царинската стапка на Индија и склучување трговски договор.
Индија и Кина се двата главни купувачи на рускиот извоз на сурова нафта по море, искористувајќи ги намалените цени што Русија беше принудена да ги прифати откако европските купувачи одбија да ги купат нејзините енергетски производи, а САД и Европската Унија воведоа санкции врз Москва поради нејзината инвазија на Украина во февруари 2022 година.
