Илјадници ѕидари, столари и други работници во Индија бараат вработување во Израел благодарение на билатералниот договор меѓу двете земји, и покрај војната меѓу Израел и Хамас.
И покрај ниските температури и зимската магла на северот на Индија, повеќе од 7.000 работници присуствувале на регрутирањето во градот Лакнау, пренесува шпанската агенција ЕФЕ.
Главниот град на државата Утар Прадеш беше сцена на еднонеделниот практичен процес на регрутирање, кој заврши минатиот вторник, каде кандидатите ги покажаа своите вештини со покривање ѕидови или поставување плочки под надзор на израелски тим.
Платата што работниците би ја добивале во Израел е една од главните причини за посакуваната миграција, околу 1.600 долари месечно во споредба со просечната месечна плата од 330 долари во Индија, според податоците на Министерството за статистика на Индија заклучно со јули 2023 година.
По почетокот на конфликтот со Хамас, Израел ги укина работните дозволи на околу 150.000 палестински работници, создавајќи недостиг на работна сила што Тел Авив се обиде да го пополни со работници од земји како Индија или соседна Шри Ланка.
„Овој договор не е добар поради безбедносните услови во Израел“, изјави за ЕФЕ Санџај Кумар Синг, генерален секретар на Конгресот на индискиот национален синдикат. Критики делат и други големи синдикати во земјата, од кои десетина ги осудија плановите за вработување во Израел.
