Американскиот милијардер Илон Маск и индонезискиот министер за здравство Буди Гунади Садикин ги лансираа интернет услугите Starlink на SpaceX за националниот здравствен сектор на Индонезија.
Целта на проектот е да се подобри пристапот до Интернет за жителите на оддалечените делови на Индонезија, дом на повеќе од 270 милиони луѓе во три различни временски зони.
„Многу сум возбуден што можеме да воспоставиме поврзување со оддалечените места. Кога имате пристап до Интернет, можете да научите сè“, рече Маск, според Ројтерс.
Индонезискиот министер за комуникации Буди Ари Сетиади, кој исто така присуствуваше на лансирањето на Starlink на Бали, рече дека Starlink сега е комерцијално достапен и потврди дека индонезиската влада е фокусирана прво на обезбедување на Интернет услуги за неразвиените региони.
Маск во понеделник треба да се сретне со индонезискиот претседател Џоко Видодо и да им се обрати на учесниците на Светскиот форум за вода што се одржува во островската држава.
Компанијата Starlink, која поседува околу 60 отсто од вкупно околу 7.500 сателити кои орбитираат околу Земјата, доминира во сферата на сателитски интернет, а Индонезија е третата земја во Југоисточна Азија каде што ќе работи Starlink.
