Израелскиот министер за финансии Безалел Смотрич потпиша директива за укинување на сите преостанати царини за увоз од САД, само еден ден пред воведувањето на реципрочните царини што ги најави американскиот претседател Доналд Трамп.
Наредбата беше поддржана од израелскиот премиер Бенјамин Нетанјаху и министерот за економија Нир Баркат и е предмет на конечно одобрување од страна на Комитетот за финансии на Кнесетот, објави „Тајмс оф Израел“.
Смотрич побара укинување на царините за производите од САД, главно од областа на земјоделството, бидејќи на 2 април американската администрација треба да воведе реципрочни царини за трговските партнери.
– Целосното укинување на царините за увоз од САД е важен чекор за зачувување на израелската економија во еден чувствителен период и зајакнување на економските односи со нашиот најважен сојузник – САД, рече министерот за финансии.
Американската влада и Трамп се подготвени да воведат серија реципрочни царини против сите други земји кои имаат царини за американски стоки.
Иако планот сè уште не е објавен, се очекува администрацијата да ја открие економската политика на 2 април. Израел и САД потпишаа договор за слободна трговија во 1985 година, според кој постепено ги намалуваа тарифите, што на крајот доведе до речиси целосно укинување на тарифите за индустриски стоки во 1995 година.
