Групацијата „Застава возила“ во стечај беше продадена на јавно наддавање по почетна цена од 68,9 милиони динари (околу 580.000 евра) на конзорциум од две компании од Крагуевац, со што започна формалното згаснување на една од најголемите фабрики во поранешна Југославија по седум години стечај.
Групацијата „Застава возила“ беше чадор компанија во која, меѓу другото, беа вклучени и фабриките – „Застава возила“, фабриката за камиони „Застава“, „Застава делови“. Како што пишува „Крагуевачка новине“, нов сопственик е конзорциумот составен од Друштвото за проектирање, инженерски и деловни услуги „Термогама“ од Крагуевац и Друштвото за производство, трговија и услуги „Ролинг ко“ од Крагуевац.
Сопственик на „Термогам“ е поранешниот директор на „Енергетика“ Милан Чировиќ, за кој „Крагуевачка новине“ претходно пишуваше дека, според податоците од катастарот, е косопственик на парцела од 10 хектари во атарот на поранешната фирма „Застава“. Овој конзорциум беше и единствениот учесник на јавниот тендер одржан на 5 март.
Тоа беше прва продажба на компанијата што Стопанскиот суд во Крагуевац ја објави по зголемена цена, што се случи поради тоа што купувачот има право на бесплатна пренамена на земјиштето во сопственост.
Ова право го донесе новиот Закон за планирање и градење, кој беше јавно критикуван дека им дава бесплатно земјиште на оние кои купуваат стечајни фирми. Поради ова, дојде до корекција на цената, односно барање земјиштето да се вклучи во проценката на компанијата.
Вреднувањето на компанијата беше значително зголемено по пресметката на вредноста на земјиштето. Така првото вреднување од 14 јули минатата година изнесуваше 72,8 милиони динари, а новото од 29 декември лани 137,8 милиони динари, односно речиси двојно повеќе.
Со тоа е постигната почетната цена на аукцијата од 68,9 милиони динари, што е 50 отсто од проценетата вредност. Групацијата „Застава возила“ се занимаваше со холдинг, односно управување со компании членки на групацијата.
