Уделот на западните валути во плаќањата за извоз на руски стоки минатата година е преполовен, изјави денеска претседателот на Руската Федерација, Владимир Путин, на седницата на президиумот на рускиот Државен совет за развој на извозот.
Според него, учеството на рубљите во плаќањата за рускиот извоз, од друга страна, во периодот од 2021 до 2023 година е речиси тројно зголемено на 39 отсто, пренесува РИА Новости.
Путин напомена и дека во светот се формираат сосема нови пазари кои Русија треба да ги земе предвид.
„Се формираат вистинските пазари на иднината, засновани на силни стратешки партнерства, принципи на комбинирање на економските потенцијали и взаемно промовирање на растот“, рече претседателот на Русија.
Според него, важно е Русија да ги разбере овие трендови и да ги поддржи своите извозни компании, пренесува ТАСС.
