Европскиот парламент и Советот на Европската унија гласаа за воведување такси за обработка на мали пакети што пристигнуваат од земји надвор од ЕУ, почнувајќи од 1 јули.
Како што објави „Тајмс оф Малта“, ова значи дека ако некој купи производ од продавач надвор од ЕУ, ќе мора да плати дополнителна царинска такса од три евра плус ДДВ.
Ако купи три различни производи, на пример панталони, здолниште и фустан, тие ќе се третираат како три различни артикли со посебни тарифни класификации и секој ќе има своја царинска давачка од три евра, што значи дополнителни девет евра давачка, плус ДДВ.
Оваа одлука е донесена, според медиумите, како одговор на големиот прилив на стоки што пристигнуваат во Европа од кинески онлајн платформи како што се „Шеин“, „Тему“ и „АлиЕкспрес“, но и од „Амазон“.
„Оваа такса ќе биде вклучена и во вкупниот износ врз основа на кој се пресметува ДДВ. Затоа, купувањето стоки со ниска вредност од земји надвор од ЕУ може да стане поскапо, а може да биде засегнат и процесот на враќање на стоките“, соопшти Царинската управа на Малта.
