Компанијата „Еуромакс ресоурсис“ упати писмо до Министерството за животна средина и просторно планирање (МЖСПП) во кое, како што истакнаа на денешната прес-конференција, ги расчистуваат сите дилеми и заблуди во однос на работата на идниот рудник за бакар „Иловица-Штука“ и од надлежните органи уште еднаш бараат да го разгледаат и да одговорат на барањето за спојувањето на концесиите „Иловица 6“ и „Иловица 11“ за кое сметаат дека нема никакви пречки да биде позитивно.
Во писмото најавуваат дека во рудникот „Иловица-Штука“ нема да се користи цијанид ниту било каква цијанидна супстанца во постапката за експлоатација, дека планираат да направат суво јаловиште за одложување на јаловината со најсовремени технологии кое нема да ги загрозува подземните води, како и дека ќе направат нов водоводен систем за локалното население и нов цевковод од акумулацијата „Турија“ за да немаат проблем со водоснабдувањето во топлите денови.
Претседателот на Одборот на директори и главен извршен директор на „Еуромакс ресурсис Лтд“ Тимоти Морган – Вин рече дека идниот рудник ќе биде јаглеродно неутрален и оти во својата работа што е можено повеќе ќе користи обновливи извори на енергија. Истакна дека од властите очекуваат што поскоро да го разгледаат нивното барање и да донесат соодветна одлука за спојување на концесиите.
-Предметот предолго е заглавен во управните и судските постапки. Сметаме дека во најдобар интерес на жителите, државата и проектот е да се донесе брза одлука за иднината на овој проект – или регионот ќе добие мега инвестиција што ќе го поттикне економскиот развој во годините што доаѓаат, или ќе бидеме принудени да разгледаме други решенија за заштита на нашата инвестиција, порача Морган – Вин.
Во одговор на новинарско прашање не сакаше да прецизира колку време ќе чекаат на одговор од властите на нивното барање и колкаво ќе биде нивното барање за отштета од државата доколку ја дадат на Арбитражен суд. Сепак посочи дека првичната проценка на инвестицијата од 400 до 500 милиони долари во 2007 година сега е речиси двојно поголема и додаде дека доколку се решат на отштетно побарување ќе бараат значаен дел од тие средства. Како поткрепа за евентуално отштетно барање го истакна билатералниот договор за заштита на инвестициите меѓу земјава и Швајцарија.
-Наидовме на препреки но не побегнавме, настојуваме да ги решиме, рече Морган – Вин на обвинувањето дека не планираат да отворат рудник во земјава, туку само сакаат да ја препродадат концесијата.
Извршниот директор на „Еуромакс ресурсис Лтд“ Николас Треанд, пак, посочи дека отворањето на рудникот ќе придонесе за економски раст и нагласи дека планираат да се усогласат со целите на еколошките активисти кои се залагаат за транзиција кон зелена енергија.
-Нашата примарна цел е да ги ублажиме стравувањата околу спроведувањето на нашиот проект, рече Треанд.
На прашање зошто на денешната прес-конференција нема претставници на компанијата „Назим Дестани груп“, која од неодамна има удел во сопственоста на компанијата, рече дека тие имаат неизвршни членови во Одборот, а тука денеска присутните на прес-конференцијата сите се извршни членови на Одборот. За „Назим Дестани груп“ рече дека не станува збор за компанија со македонски капитал, туку за компанија со холандско – германски капитал.
Извршниот директор на „Еуромакс ресоурсис ДОО Скопје“ Дамиан Петровски истакна дека меѓу највисоките приоритети на компанијата останува одржувањето на соработката и комуникацијата со локалното население и додаде дека реализацијата на овој проект не значи сценарио или-или.
-Напредокот на современите технологии го отвора патот за соживот и истовремен развој на рударската индустрија и на земјоделството под поволни услови. Се обврзуваме да бидеме поддршка на локалното земјоделство преку нудење финансиска помош за набавка на најнапредни земјоделски машини, рече Петровски.
Порача дека рудникот ќе отвори нова ера на вработување и добри односи со земјоделците од реионот.
Од компанијата велат дека реализацијата на планот за изградба на рударскиот комплекс „Иловица – Штука“ означува значителна инвестиција во износ од 340 милиони евра која ќе генерира приближно 1.000 директни работни места во фазата на изградба и 500 директни работни места за време на работата на рудникот.
-Покрај неговото непосредно влијание врз вработувањето, проектот е ќе даде значителен придонес во бруто домашниот производ на земјата, вбризгувајќи средства и во државниот и во општинскиот буџет. Позитивен ефект ќе има врз локалните бизниси, кои ќе имаат значителни придобивки. Проекциите сугерираат годишен прилив од околу 74 милиони евра во овие локални претпријатија, прецизира Морган – Вин.
