Европските берзански индекси денеска се во слобоен пад откако вчера американскиот претседател Доналд Трамп воведе реципрочни царини на повеќе од 180 земји и територии низ светот, вклучително и царина од 20% за производи увезени од Европската унија и 10% за производи со потекло од Велика Британија.
Администрацијата на Трамп, која го прогласи 2 април за тн. „Ден на ослободувањето“, исто така воведе и царини од 25% на целиот увоз на автомобили од странско производство, пренесува Си-Ен-Ен.
Според претседателот Трамп, тој датум „засекогаш ќе биде запаметен како денот кога се препороди американската индустрија“.
Франкфуртската берза DAX денеска во 9:30 часот падна на 21.868,05 поени, британскиот FTSE 100 на 8.488,95 поени, францускиот ЦАЦ 40 на 7.681,67 поени, додека московскиот MOEX се искачи на 2.946,28 поени.
Акциите на многу европски компании денеска паѓаат. Вредноста на германската Пума падна за девет проценти, Адидас 8,6 проценти, шведската Волво девет отсто, а данската бродска компанија Маерск бележи пад од 7,4%.
На вчерашното затворање на берзата, вредноста на американскиот берзански индекс Дау Џоунс се искачи на 42.225,32 поени, СиП 500 индексот падна на 5.670,97 поени, а вредноста на Насдак индексот падна на 17.601,05 поени.
Според сегашните берзански податоци, цената на суровата нафта падна на 69.157 долари, а на нафтата Брент на 72.412 долари. Цената на златото падна на 3.120,99 долари за унца, додека вредноста на еврото во однос на доларот на берзата Forex изнесува 1,09752, што е повисока од вредностите забележани во тргувањето вчера.
