Деловната активност во еврозоната повторно забележа раст во јули, првпат по четири месеци стагнација, покажуваат најновите податоци од истражувањето на S&P Global. Закрепнувањето е поттикнато од зголемувањето на новите нарачки и подобрите резултати и во производствениот и во услужниот сектор, што ги надмина очекувањата на економистите.
Композитниот PMI индекс се искачи на 51,9 поени, во споредба со 50,0 во јуни, што претставува највисоко ниво во последните пет месеци. Вредност над 50 поени означува експанзија на економската активност, додека пониска вредност сигнализира пад.
Според главниот економист на S&P Global Market Intelligence, Крис Вилијамсон, јули донел охрабрувачки сигнали за европската економија, но предупреди дека геополитичката нестабилност и натаму претставува сериозен ризик за понатамошното закрепнување.
Економистите посочуваат дека растот на новите нарачки е прв од февруари наваму и најсилен во повеќе од две години, што укажува дека компаниите повторно добиваат поголем обем на работа. Сепак, тие предупредуваат дека високите цени на енергенсите и инфлациските притисоци можат брзо да го променат позитивниот тренд.
Иако последните показатели се подобри од очекувањата, аналитичарите сметаат дека европската економија ќе продолжи да расте со умерено темпо, бидејќи неизвесноста околу глобалните конфликти и натаму влијае врз деловната доверба и инвестициите.
