Швајцарскиот франк денес порасна во однос на американскиот долар и сега е на ниво невидено повеќе од 10 години, дополнително комплицирајќи ја позицијата на Швајцарската национална банка (SNB) и отворајќи дилеми за монетарната политика.
Франкот зајакна за повеќе од три проценти од почетокот на годината и се тргува под 0,77 франци за долар, откако забележа раст од околу 14 проценти во 2025 година.
Аналитичарите предупредуваат дека силниот франк ги засилува дефлаторните притисоци во Швајцарија, каде што годишната инфлација е само 0,1 процент, додека некои експерти проценуваат дека има простор за понатамошно зајакнување на валутата, објавува швајцарскиот инфо портал.
Растот на франкот беше поттикнат од политичката неизвесност во Соединетите Американски Држави, вклучително и загриженоста на инвеститорите за непредвидливите економски политики на администрацијата на претседателот Доналд Трамп и прашањата за независноста на американската централна банка.
Јапонскиот јен, исто така традиционално безбедно засолниште за капиталот, овој пат не беше стабилен поради распродажбата на јапонските државни обврзници. Експертите забележуваат дека клучниот девизен курс за Швајцарија е односот на франкот кон еврото поради нејзините силни трговски врски со еврозоната.
Падот на еврото под нивото од 0,9 франци би можел значително да ја влоши конкурентноста на швајцарските извозници.
Швајцарската национална банка се соочува со дилема, бидејќи намалувањето на каматните стапки, кои моментално се на нула, би можело да ја намали привлечноста на франкот, но би го зголемило ризикот од прегревање на економијата поради пребрзиот раст.
Доколку банката интервенира директно на девизниот пазар, би можела да се соочи со обвинувања за манипулација со валутата, се додава во анализата.
