Германската влада планира промена на правилата за работници од земјите од Западен Балкан од 1 јануари 2027 година. Наместо досегашните 50.000, бројот на визи би можел да биде намален на 25.000 годишно.
Според актуелните правила, граѓаните на Албанија, Босна и Херцеговина, Косово, Црна Гора, Северна Македонија и Србија можат да работат во Германија доколку имаат договор за работа.
Како дел од реформскиот пакет од 34 точки, CDU/CSU и SPD планираат од 1 јануари 2027 година да ја преполоват квотата од 50.000 на 25.000 визи годишно. Централниот сојуз на германската градежна индустрија (ZDB) предупредува дека тоа може да доведе до недостиг на работници и проблеми со реализацијата на инфраструктурни проекти.
„Ова би бил тежок удар за градежната индустрија. Близу 30 проценти од визите одат во градежниот сектор. Ниту една друга индустрија не ја користи оваа регулатива во толкава мера“, соопшти сојузот.
Германската влада намалувањето го образложува со растот на невработеноста во земјата.
Според Сојузната агенција за вработување (BA), Правилото за Западен Балкан генерално се однесува на сите видови вработување, дури и без потреба од квалификации. Исклучени се само регулираните професии, како лекарите, за кои најпрво е потребно признавање на квалификациите.
„Секој седми градежен работник има странски пасош. За градежната индустрија, оваа регулатива е најуспешниот модел за регрутирање работници и стручњаци од трети земји. Силно предупредуваме на последиците од преполовувањето на квотата. Градежната индустрија до крајот на годината би можела да загуби 8.000 работници“, изјави генералниот директор на ZDB, Феликс Паклепа.
Побарувачката за визи од земјите од Западен Балкан е голема. Квотата за 2025 година беше исполнета уште кон крајот на ноември, по што апликациите мораше да бидат одбивани.
Според ZDB, Сојузната агенција за вработување минатата година издаде дури 105.000 одобренија, бидејќи поради долгото чекање во визските оддели секое одобрение не резултира и со влез во Германија.
„Оваа регулатива функционира токму онака како што креаторите на политиките ја замислуваат легалната миграција. Секој што доаѓа мора да има договор за работа“, изјави Паклепа.
Според Институтот за истражување на пазарот на трудот и занимањата (IAB), 98 проценти од имигрантите се вработени. Околу 58 проценти работат како квалификувани работници, специјалисти или експерти, иако тоа не е услов.
„Правилото за Западен Балкан претставува доселување поради работа, а не поради социјална помош. Токму CDU/CSU и SPD го воведоа во 2016 година. Не треба сега да го уништуваат сопствениот успешен модел“, нагласи Паклепа.
Градежната индустрија ја повикува германската влада да ја задржи квотата на најмалку 50.000 работници, да ги дигитализира и забрза визските процедури и да разгледа можност за проширување на програмата и на други земји.
