Со одлични технички решенија што го красат третиот електричен автомобил на Porsche, луѓето зад воланот нема да почувствуваат дека во моментот го возат најтешкиот сериски модел во историјата на познатата германска автомобилска компанија.
Неодамна претставениот електричен Cayenne, чија маса во помоќната верзија е 2.645 килограми, е најтешкиот сериски модел на Porsche досега, што не е особено изненадувачки ако помислиме на голем SUV со два електрични мотори што ги „хранат“ батериите (113 kWh) чија маса е 600 килограми.
Не оспорувајќи ја старата поговорка дека килограмите не се пријател на управувањето со автомобилот, Porsche вели дека потенцијалните купувачи на електричниот Cayenne не треба да се грижат за декларираната тежина, бидејќи во пракса тие дури и нема да ја почувствуваат, што е резултат на поставувањето на батериите под подот, новоразвиените оски/гуми и супериорната адаптивна суспензија што ќе обезбеди оптимален одговор во сите ситуации.
„Горди сме, бидејќи успеавме да создадеме електричен Cayenne кој му дава на возачот чувство дека е 75 килограми полесен од неговиот истоимен модел со 4-литарски V8 мотор“, рече Михаел Шацле, вториот човек на проектот на третиот модел на Porsche кој се напојува само со електрична енергија.
За потсетување, електричниот Cayenne (за кој и Шацле тврди дека е подобар на неасфалтирани површини од конвенционалната верзија) има 442 КС и 835 Nm вртежен момент во стандардната верзија, а едно полнење на батериите обезбедува патување до 642 километри (WLTP). Зад името Turbo се крие значително помоќна верзија, а двата електрични мотори во овој случај произведуваат 1.156 КС и 1.500 Nm вртежен момент, што обезбедува забрзување од 0 до 100 km/h за 2,5 секунди и 260 km/h.
Постојат големи шанси електричниот „Cayenne“ да не остане најтешкиот автомобил на „Порше“, бидејќи веќе е познато дека во Штутгарт подготвуваат уште поголем теренец со три реда седишта, кој исто така ќе се нуди во комбинација напојувана само од електрични мотори.
