|
Жителите на Барселона излегоа на улиците во текот на викендот за да протестираат против масовниот туризам, кој го обвинуваат за вртоглавото покачување на цените на киријата. Тие велат дека градот станал „неиздржлив“. Повеќе медиуми објавија дека илјадници демонстранти, вклучително и повеќе од 150 организации, маршираа низ Барселона во саботата.
На фотографиите се гледаат демонстранти кои носат натписи „Барселона не се продава“ и „Туристи, одете дома“. Снимките до кои дојде Би-Би-Си покажуваат како демонстрантите ги прскаат туристите со водени пиштоли и извикуваат „Оди дома!“
Барселона е дестинација која привлекува милиони туристи. Иако приливот на патници носи пари во економијата на Барселона, жителите се жалат дека кириите во споредба со лани поскапеле за 18 отсто поради масовниот туризам.
Еден демонстрант изјави за Ројтерс дека „градот целосно се сврте кон туристите „Ние сакаме град за граѓаните, а не град во служба на туристите. Друг рече дека туристичките места како што се рестораните и хотелите заработуваат добри пари од туристите, но некои локални жители „се во многу лоша ситуација и немаат доволно пари за живот“.
Претставниците на Барселона во последните месеци презедоа мерки за решавање на проблемот со прекумерниот туризам. Градот ја зголеми туристичката такса во април, пишува USA Today, и ги објави плановите за забрана на сите краткорочни изнајмувања во јуни.
„Потребна е поголема понуда на станови, а мерките што денеска ги презентираме се насочени кон обезбедување поголема понуда за работничката средна класа да не мора да го напушта градот бидејќи не може да си дозволи стан“, изјави градоначалникот на Барселона, Жаум Колбони. Оваа мерка нема да ја промени состојбата од денеска за утре“, рече тој.
Во 2023 година, Барселона им забрани на бродовите за крстарење да се приклучуваат на еден од нејзините терминали со цел да се реши проблемот со пренатрупаноста и загадувањето.
