Унгарскиот премиер Виктор Орбан по седницата на Унгарскиот совет за одбрана објави дека наредил зголемена заштита на критичната енергетска инфраструктура поради, како што изјави, политички мотивирана блокада на испораките на нафта од Украина.
Орбан тврди дека Киев се подготвува за дополнителни акции насочени кон нарушување на работењето на унгарскиот енергетски систем.
Како што прецизираше, зголемената заштита вклучува распоредување војници и потребната опрема за одбивање на евентуални напади во близина на приоритетни енергетски објекти, додека полицијата ќе ги зголеми патролите околу одредени електрани, дистрибутивни станици и контролни центри.
Според унгарскиот весник „Маѓар Немзет“, Орбан потсети во видео порака објавена на социјалните мрежи дека од 27 јануари нафтата нема да пристигне во Унгарија преку гасоводот „Дружба“.
„Податоците јасно покажуваат дека овој неоправдан преседан има политички причини и дека украинската влада врши притисок врз Унгарија и Словачка со блокирање на нафтата“, рече Орбан.
Унгарскиот премиер, исто така, изјави дека на седницата ги слушнал извештаите на службите за национална безбедност, врз основа на кои е заклучено дека Украина се подготвува за нови акции насочени кон нарушување на функционирањето на унгарскиот енергетски систем.
„Унгарија не може да биде уценувана!“, нагласи Орбан на крајот од својот говор.
Испораките на руска нафта до Унгарија и Словачка преку нафтоводот „Дружба“ се прекинати од 27 јануари, кога Киев соопшти дека рускиот напад со беспилотни летала ја погодил опремата на цевководот во западна Украина.
Будимпешта и Братислава ја обвинуваат Украина за прекинот на испораките, додека Киев вели дека работи на поправка на цевководот.
