Мултимилионерите и милијардерите се закануваат дека ќе се преселат поради предлогот според кој жителите со наследство во вредност од повеќе од 50 милиони франци (53,1 милиони евра) ќе плаќаат данок од 50 отсто за сумата над оваа граница.
Во истражувањето спроведено од ревизорската куќа PwC во јуни, две третини од сопствениците на бизниси чии наследници би можеле да бидат засегнати од новиот данок посочија дека размислуваат за превентивен трансфер на нивните средства на други членови на семејството. Повеќе од половина рекле дека размислуваат да се преселат во странство, пренесува Форбс Хрватска.
Швајцарија во моментов нема данок на наследство на државно ниво. Некои кантони имаат таков данок, но сопружниците и децата, односно првата линија на наследување, во повеќето случаи се ослободени. Даночната стапка на наследство во одредени кантони е максимум 3,5 проценти.
Противниците на предлогот, покрај ризикот богатите едноставно да се иселат, гледаат и опасност од економска штета. Предупредуваат дека предложениот данок е толку висок што наследниците на фирмите би морале да продаваат имот за да го платат. Ова би ги загрозило работните места, особено ако купувачот е странец, бидејќи тешко дека ќе го задржи производството во скапата Швајцарија.
Стефан Леге, раководител на Одделот за даночна и трговска политика на Универзитетот Св. Гален, за Блумберг изјави дека најбогатите не се подготвени да го платат овој данок и предупреди на контрапродуктивната природа на предлогот. Загубата на приход поради емиграцијата на богатите жители ќе треба да се компензира со зголемување на даноците за останатите.
„Тие се виновни за климатската криза, затоа треба да платат повеќе“
Данокот го предложи младиот социјалдемократ – Јусо, кој предлага државата да ги искористи приходите од овој данок за финансирање мерки за решавање на климатската криза.
Најбогатите го искористија економскиот систем што ја предизвика климатската криза, па затоа треба да платат повеќе од другите членови на општеството за да се борат со последиците – изјави Миријам Хостетман, претседателка на Јусо, која собра 100.000 потписи за националниот референдум.
За предлогот Швајцарците треба да гласаат за околу две години, а парламентот допрва ќе расправа за него. Владата е против предлогот.
Идеите за повисоко оданочување на најбогатите не се случуваат само во Швајцарија. Владите во делови од светот размислуваат како да истиснат повеќе од најбогатите за полесно да се справат со големите дефицити и да ги финансираат јавните услуги. Насекаде има предупредувања дека ваквите мерки ќе доведат до заминување на богатите и губење на инвестициите.
На пример, Обединетото Кралство ги прекинува даночните олеснувања за нерезидентите со високи примања, а Шпанија воведе привремен данок на богатство за плаќање на програмите за социјална помош во време на висока инфлација. Бразил, кој оваа година претседава со Г-20, предложи глобален данок за најбогатите, но мислењата на земјите се различни. Меѓу противниците беа и САД.
