Вработените во аптеките ширум Холандија денеска излегоа на дводневен штрајк на повик на синдикатите FNV и CVN, барајќи ретроактивно и идно зголемување на платите откако пропаднаа преговорите за новиот колективен договор.
Илјадници аптеки ќе бидат затворени, а пациентите во Холандија ќе се соочат со дополнителни непријатности бидејќи многу аптеки во земјата вообичаено не работат за време на викендот, пишува NL Times.
Протестот нема да влијае на специјалните аптеки кои се достапни за итни случаи и работат надвор од стандардното работно време, но пациентите во некои случаи ќе треба да платат и до 85 евра повеќе по лек доколку рецептот не е покриен со основниот пакет здравствено осигурување.
Работниците бараат ретроактивно зголемување на минималната плата за шест отсто до 1 јули 2024 година и минимална плата од 16 евра на час, како и надоместок за целото време што го поминуваат во аптека, вклучително и подготовка пред да почнат со работа.
Работодавачите тврдат дека е невозможно да се исполнат барањата на работниците поради исплатите на здравственото осигурување и владините полиси, па затоа на фармацевтите им понудиле ретроактивно зголемување на платите за два отсто од 1 јули 2024 година и зголемување за пет отсто од 1 јули 2025 година.
Синдикатите првично планираа да штрајкуваат во пресрет на Божиќ според Грегоријанскиот календар и да ја прекинат работата дури девет дена, вклучувајќи ги и викендите.
Меѓутоа, холандскиот суд издаде налог за блокирање на деветдневниот штрајк, сметајќи дека таквиот протест ќе ги доведе пациентите во опасност.
