Кралот на Мароко, Мохамед VI, донесе контроверзна одлука новиот автопат, кој поминува и низ спорната територија Западна Сахара, да го именува по американскиот претседател Доналд Трамп.
Автопатот, кој го носи името на претседателот на САД, е долг 1.055 километри и го поврзува градот Тизнит во западниот дел на Мароко со градот Дахла во Западна Сахара.
Овој потег го коментираше и самиот Трамп, кој му се заблагодари на мароканскиот крал.
„Благодарам на Неговото Височество Мохамед VI, кралот на Мароко – каква голема чест! Со нетрпение очекувам еден ден да патувам по целата должина на овој голем автопат, се надевам наскоро“, порача Трамп.
Западна Сахара, која Мароко ја контролира од 1975 година, е територија врз која право полага и домородниот народ Сахрави. Фронтот Полисарио, поддржан од Алжир, со децении води борба против мароканската држава за независност на оваа територија.
Соединетите Американски Држави во 2020 година го признаа суверенитетот на Мароко над Западна Сахара, во замена Мароко да ги нормализира односите и да го признае Израел.
Изградбата на новиот автопат започна во 2015 година. Тој се протега речиси по целата должина на Западна Сахара, од север кон југ, минувајќи низ главниот град Лајун.
