Владата на Црна Гора вчера го одобри Предлогот за изменување и дополнување на Законот за акцизи, со кој се предлага воведување акциза за негазирана вода со додаден шеќер или други средства за засладување или ароматизација и безалкохолно пиво.
Владата го предложи ова решение со цел да се намали негативното влијание што употребата на шеќерни производи го има врз здравјето на населението.
Зголемување на приходите
„Висината на акцизата за негазирана вода со додаден шеќер е 25 евра за хектолитар, што е исто колку и за газирана вода со додаден шеќер или други средства за засладување или ароматизација“, објаснуваат од Владата.
Зголемување на буџетските приходи по овој основ се очекуваат за околу два милиони евра на годишно ниво.
На седницата беше усвоен и Предлог-законот за изменување и дополнување на Законот за пензиското и инвалидското осигурување со кој, меѓу другото, се утврдува новиот номинален износ на најниската пензија, кој од 1 јануари ќе изнесува 450 евра.
