Рокот што Белата куќа ѝ го постави на Москва да покаже конкретен напредок кон прекинување на војната во Украина истекува денес, во спротивно се соочува со нови, построги економски санкции, пишува Ројтерс.
Американскиот претседател Доналд Трамп вчера, кога беше прашан дали ќе се држи до рокот, кратко коментираше за рускиот претседател Владимир Путин: „Ќе зависи од него. Ќе видиме што има да каже. Ќе зависи од него. Многу сум разочаран.“ Белата куќа предупреди дека руските купувачи на нафта ќе се соочат со секундарни тарифи ако Москва не го почитува ултиматумот.
Двајца претставници на Белата куќа и еден висок функционер на администрацијата потврдија за Скај њуз дека воведувањето секундарни санкции против Русија сè уште се очекува, и покрај најавите за можна средба меѓу Трамп и Путин. Од друга страна, Путин рече дека Русија е подготвена да ги издржи сите нови економски тешкотии што ги наметнуваат САД и нивните сојузници.
Јуџин Румер, поранешен аналитичар на американската разузнавачка служба за Русија, а денес раководител на Програмата за Русија и Евроазија во Карнегиевата фондација за меѓународен мир, верува дека постои „скоро нула шанса“ Путин да се согласи на прекин на огнот поради заканите за царини и санкции.
„Теоретски, ако ги прекинете купувањата на индиска и кинеска нафта, тоа би бил многу тежок удар за руската економија и воените напори. Но, тоа нема да се случи“, рече Румер, додавајќи дека Кина веќе сигнализирала дека ќе продолжи да купува руска нафта без оглед на американските закани.
