Целото банкарство во оваа земја од Пацификот се вршеше со готовина, но отсега тоа ќе се промени, почнувајќи на главниот остров Фунафути, пренесува Гардијан.
Тувалу, една од најоддалечените нации во светот, ги претстави своите први банкомати поставени во надворешниот дел на седиштето на Националната банка на Тувалу, во селото Вајаку на Фунафути, главниот остров во земјата.
Церемонијата одржана во вторникот означи историска промена за островската држава со 12.000 жители, која никогаш претходно немала пристап до електронско банкарство. На настанот присуствуваа премиерот Фелети Тео, генералниот гувернер, племенските водачи, членовите од парламентот на Тувалу и претставници од дипломатскиот кор и бизнис секторот, заеднички дочекувајќи го долгоочекуваниот чекор кон финансиската модернизација.
Досега, целото банкарство во Тувалу се вршеше во готовина. На денот на исплата, работниците чекаат редици во Националната банка за да ги подигнат своите плати, процес кој често води до долги низи и ограничен пристап по затворањето на банката, во 14:00 часот. Дневните трансакции за основни намирници, хотели и услуги остануваат речиси целосно засновани на готовина.
„Ова денес не само што е значаен настан, туку е и историски, бидејќи банката преминува во една сосема нова ера, не само во однос на нејзините услуги, туку и во однос на нејзината стратешка насока“, изјави Тео за време на неговиот главен говор.
Започнати како идеја во 2021 година, вкупните трошоци за банкоматите и системот надминаа 3 милиони австралиски долари, според генералниот директор на банката, Сиосе Пенитала Тео.
„Ние цело време бевме во аналоген простор, ова беше само сон за нас“, рече Тео и додава дека овие машини не се евтини, но со владина поддршка и чиста одлучност, успеале да ја развијат оваа услуга за нивните луѓе.
Премиерот на Тувалу рече дека банката првично соработувала со надворешен советник, но подоцна склучила договор со Pacific Technologies Limited од Фиџи за да ги испорача и инсталира системите, кои сега ќе бидат оперативни на повеќе локации на Фунафути, вклучително и на аеродромот и во локалните села. Поставени се пет банкомати, а низ островот ќе бидат поставени вкупно 30 продажни терминали.
„Истражувавме различни опции и презедовме должно внимание за да најдеме економични решенија прилагодени на потребите на нашите клиенти“, вели Тео и посочува дека така ги набавиле банкоматите и системите за продажните места, кои сега се во функција.
Засега на машините може да се користат само припејд картички.
Банката планира следно да воведе дебитни картички издадени од Тувалу, со цел да обезбеди функционалност за дебитна и кредитна картичка Visa која може да се користи во странство за патување и купување преку Интернет.
Со околу 6.000 банкарски клиенти, од кои многумина имаат повеќе од една сметка, се очекува воведувањето на електронското банкарство да го олесни метежот и турканиците, да ја намали зависноста од готовина и да го подобри пристапот до финансиските услуги низ надворешните острови.
„Ние ја обезбедуваме услугата бесплатно додека луѓето не ја добијат“, завршува премиерот на Тувалу, Тео и додава дека со текот на времето ќе разгледале воведување на банкарски давачки, но дека сега се работи на пристапноста и напредокота.
