Американскиот претседател Доналд Трамп најави дека ќе воведе нови царини за увоз на граѓа и производи од дрво.
Американскиот претседател Доналд Трамп најави дека во текот на следниот месец ќе воведе нови царини од 25 отсто за увоз на граѓа и производи од дрво, откако претходно изјави дека планира да воведе царини за увоз на автомобили, полупроводници и фармацевтски производи.
Трамп им рече на новинарите во претседателскиот авион дека планира тарифите од 25 отсто за граѓа и производи од дрво да стапат на сила околу 2 април, кога очекува да воведе царини за увоз на автомобили во приближно ист износ, објави Ројтерс.
Тој посочи дека САД ќе генерираат големи приходи од царините, но понуди и одложување на воведувањето тарифи доколку другите земји ги намалат или укинат сопствените давачки за увоз на американски стоки.
Трамп во вторникот рече дека има намера да воведе слични царини за увоз на полупроводници и фармацевтски производи. Тие, исто така, првично би изнесувале 25 проценти или повеќе, а потоа значително ќе се зголемат во текот на годината. Американскиот претседател не кажа точно кога ќе ги воведе овие царини.
Ново стариот американски претседател Трамп воведе дополнителни царини од 10 отсто за увоз на сите производи од Кина бидејќи, како што наведе, Пекинг не успеал да ја запре трговијата со фентанил.
Тој, исто така, најави, потоа одложени за еден месец, царини од 25 отсто за увоз на стоки од Мексико, како и за увоз од Канада, освен за енергетски производи.
Минатата недела Трамп објави дека планира да воведе реципрочни тарифи за сите земји кои имаат царини за американски стоки или имаат поставено нетарифни бариери за да го ограничат американскиот пристап до нивните пазари.
