Американскиот претседател Џо Бајден сака потенцијално да воведе нови „големи“ санкции насочени кон рускиот енергетски сектор пред да му ја предаде власта на Доналд Трамп, објави денеска Вашингтон пост, повикувајќи се на анонимни извори.
Изворите објаснија дека во последниот обид да ги спречи воените планови на рускиот претседател Владимир Путин во Украина, Белата куќа има за цел да ја „удри“ „флотата во сенка“ на меѓународни бродови кои се занимаваат со измамнички практики, транспортирајќи руска нафта во незападни земји.
Покрај тоа, на списокот се и руските извозници на нафта кои се уште не се санкционирани. Опциите вклучуваат и одземање на лиценцата што им овозможува на банките да ги обработуваат руските енергетски трансакции, велат изворите.
Тие понатаму истакнаа дека тоа ќе му даде на тимот на Трамп „повеќе моќ“ во мировните преговори меѓу Москва и Киев.
Групата седум најразвиени земји, Г7, истражува начини за значително намалување на плафонот на цената на руската нафта, бидејќи се обидува да ја загрози способноста на Москва да ја финансира војната против Украина.
Опциите што се разгледуваат се движат од суштинска замена на постоечкиот механизам со забрана за ракување со руската сурова нафта до намалување на прагот на цената од сегашните 60 на околу 40 долари за барел, велат упатените за Блумберг.
Се гледа дека Москва се свртува кон тајна флота танкери за да ја пренесе својата нафта на нови пазари, особено во Азија. Оваа флота во сенка и помогна на Русија да ги надмине ограничувањата, со цените на суровата нафта над плафонот на цената во поголемиот дел од годината.
