Според истражувањето на германското здружение за дигитализација Битком, просечниот заинтересиран купувач поминува седум часа онлајн барајќи го она што го сака, по цена која е подготвени да ја плати.
Но, тоа време во Македонија беше зголемено во последните седум дена затоа што трговците со агресивна маркетинг кампања на социјалните мрежи од „Црниот петок“ кој секаде трае само еден ден, односно во последниот петок од ноември, направија „Црна недела“.
Тоа е нов трик на македонските трговци за „Блек Фрајдеј“ откако ги открија купувачите дека не го нудат она што го ветиле и дека попустите се всушност минимални и на производи од постара генерација.
Во САД, колевката на ова шопинг лудило, се нудат вистински попусти на одредени производи со одредена количина и затоа купувачите се тепаат буквално пред маркетите.
Во Македонија трговиците нудат наводно големи попусти цела недела, а дополнително намалување на цените има денес, на „црниот петок“.
Во некои продавници намалувањето е и до 80 отсто, но само на флаерот. Кога ќе влезете во продавницата, ќе видите дека тоа е попуст за модел на телевизор стар пет години кој го нема на залиха и е единствено парче во синџир од 20 продавници. Кај новите производи попустите се движат од 5 до 20 отсто.
– Сакав да купам машина за перење од марката „Фаворит“ во „Техномаркет“. Пред еден месец во рамки на акцијата „Најбарани“, производот од редовна цена 19.999 беше намален на 13.994 денари. Решив да го почекам „црниот петок“ кога и попустите се најголеми, но денес се шокирав бидејќи производот е со намалена цена од 13.993, односно е намален за само уште еден денар. Можеби ова не е измама, но е нечесно да им понудиш на купувачите намалување од еден денар – изјави револтиран купувач кој пазареше во „Капитол мол“ во Скопје.
Меѓу акциските флаери од последниот месец кај овој трговец можеа да се забележат различни цени за „Црн петок“ и за акцијата „Најбарани“ која им се нудела на потрошувачите од 1 до 12 ноември. Вградлива фурна на „Амика“ се продавала на почеток на ноември по цена од 10.994 денари, а денес има цена од 12.992 денари што е зголемување за речиси 2.00 денари.
Комбиниран ладилник кој бил на цена од 9.994 денари, сега се продава за четири денари поскапо, по цена од 9.998 денари. Машина за садови од 60см која во акцијата „Најбарани“ имала цена од 12.994 денари денес се продава 14.992 денари или поскапо за 2.002 денари. Машина за перење на „Самсунг“ од 9кг пред еден месец се нудела на акција по цена од 23.793 денари или со 29% попуст, а денес за „Црн петок“ е 26.997 денари или поскапа за 3.204 денари.
Но, има и неколку забележливи попусти. Електричен шпорет со рингли кој се продавал на почеток од ноември по цена од 10.794 денари, денес на „Црн петок“ се продава по цена од 9.998 денари, додека апарат за леб на „Тефал“ кој се продавал на истата акција 5.999 денари, сега е поевтин за 500 денари.
Од Организацијата на потрошувачите на Македонија апелираат до купувачите да внимаваат и да не наседнуваат на маркетинг-триковите на трговците. Според Законот за заштита на потрошувачите, цената што важела пред 30 дена се зема како основа за попустот, а не попустот на цената што бил на почетокот на годината.
Според Организацијата на потрошувачи, попустите не смеат да бидат изразени само во проценти, туку покрај процентот треба да стои и намалената цена за да не се доведат купувачите во заблуда и да видат колкав е попустот.
Овие трикови на трговците не се недозволени, а по „црниот петок “обично цените се враќаат на старо. Оваа нефер трговска практика е казнива според новиот Закон за нефер трговски практики ако Државниот пазарен инспекторат утврди злоупотреби на терен.
О.К
Редакција Бизнис 365
