Еден од најпознатите српски брендови – „Плазма“ кексот на компанијата „Бамби“, наскоро ќе биде достапен и во Кина. Популарната посластица ќе се најде во менито на најголемиот кинески синџир кафулиња „Luckin Coffee“, каде што потрошувачите ќе можат да уживаат во Плазма чизкејк и Плазма шејк.
На официјалната средба на претставници на „Бамби“ и „Luckin Coffee“, беше истакнато дека оваа соработка претставува значаен чекор за проширување на српските производи на азискиот пазар. Министерот за земјоделство Драган Гламочиќ изјави дека проектот е пример за „челичното пријателство“ меѓу Србија и Кина, додавајќи дека Плазма не е само производ, туку симбол на традиција и квалитет.
Од кинеската компанија нагласија дека се горди што ќе понудат производ со препознатлив идентитет и вкус кој веќе обележал генерации во Србија и регионот. „Убеден сум дека потрошувачите во Кина ќе го препознаат квалитетот и автентичноста на Плазма брендот,“ стои во соопштението.
„Luckin Coffee“, основана во 2017 година, за кратко време стана најбрзо растечки синџир кафулиња во светот со над 20.000 објекти, а соработката со „Бамби“ се гледа како чекор кон дополнително збогатување на нивната понуда.
