Резервациите на меѓународни летови низ светот се намалени од почетокот на конфликтот меѓу Израел и палестинскиот Хамас, што сигнализира застој во закрепнувањето на патувањата од шокот од пандемијата, покажаа податоците на ForwardKeys.
Глобалната побарувачка за патувања е ослабена по упадот на Хамас во Израел на 7 октомври во кој загинаа 1.400 луѓе, според израелските податоци. Израел одговори со напади врз Газа во кои според палестинските податоци загинаа повеќе од 10.000 луѓе.
„Таа војна е катастрофална, ужасна човечка трагедија што сите ја гледаме на нашите ТВ екрани секој ден. Ова секако ги одвраќа луѓето да патуваат во регионот, но исто така ја намали подготвеноста на потрошувачите да патуваат во други делови на светот“, рече Оливие Понти од ForwardKeys.
Во трите недели по нападите на 7 октомври, резервациите за меѓународни летови од Северна и Јужна Америка беа шест отсто повисоки отколку во периодот пред пандемијата во 2019 година, но во исто време четири отсто пониски отколку во 2019 година.
Три недели пред 7 октомври, Европа заостануваше зад годината пред пандемијата за 15 отсто, а три недели по нападот на Хамас за 17 отсто. И на глобално ниво, пред 7 октомври, резервациите заостанаа зад 2019 година за 15 проценти, а по нападот за 20 проценти.
Резервациите на меѓународни летови до регионот на Блискиот Исток се зголемени за 13 отсто пред почетокот на октомври во однос на годината пред пандемијата, а во тринеделниот период од 7 октомври забележале минус од 13 отсто.
Само еден ден пред нападот, резервациите покажаа дека глобалното воздушно патување во последниот квартал ќе биде многу блиску до нивото пред пандемијата, само за разликата повторно да се зголеми на крајот на октомври, на околу 20 проценти.