Пилар Хернандо живее во приколка во предградието на Палма де Мајорка и се тушира во локалниот спортски центар.
Хернандо (45), која се бори да најде работа во барови и ресторани, рече дека не може да си ги дозволи кириите, кои значително се зголемија делумно поради брзиот развој на туризмот на шпанскиот остров.
Цените растат, кириите растат, сè расте освен платите“, рече Хернандо, пренесува Пословни дневник.
Таа е една од многуте жители на Мајорка кои почнаа да живеат во приколки паркирани во привремени кампови поради превисоките цени на становите и сопствениците кои претпочитаат да ги изнајмуваат на туристи.
Тој тренд предизвика протести на островот, како и во најпосетуваниот град во Шпанија, Барселона и на други места. Минатата недела, околу 10.000 протестанти учествуваа на митинг против масовниот туризам во Палма де Мајорка.
Во градот има три такви локации со кампери. Локалните власти обезбедија систем за рециклирање, но жителите велат дека има само едно место на островот за отстранување на отпадната вода. Тие тврдат дека не смеат да ги отвораат прозорците или да поставуваат маси надвор бидејќи се паркирани на јавни површини.
Полицијата им се заканува со парични казни, а локалната самоуправа тврди дека не може да им обезбеди дополнителни услови и ги упатила до службите за социјална помош, велат камперите.
Владата на Балеарските Острови не одговори веднаш на барањето за коментар.
Активистите за борба против туризмот во Шпанија велат дека посетителите ја зголемуваат цената на сместувањето, што го прави недостапно за жителите во центрите на градовите.
До мај Шпанија ја посетиле 33 милиони туристи, што е за 14 отсто повеќе во споредба со истиот период во 2023 година.
По Каталонија, Балеарските Острови беа најпопуларната шпанска провинција за туристи минатата година, со 14,4 милиони посетители, соопшти шпанската канцеларија за статистика.
Туризмот, исто така, сочинува 45 отсто од БДП на островот, соопшти здружението за туристичка индустрија Exceltur.
Посетителите сè повеќе претпочитаат викендици на апликации како Airbnb, при што краткорочните изнајмувања од странски туристи се зголемуваат за 24 отсто меѓу март и мај, објави Exceltur.
Изнајмувањето на островите порасна за 158 отсто во изминатата деценија, што е најголрм пораст во Шпанија, според веб-страницата Фотокаса.
Просечната кирија за стан од 80 квадратни метри во шпанскиот архипелаг била 1.447 евра во јуни, според Fotocasa. Просечната плата во Шпанија е 1.925 евра, соопшти заводот за статистика.
Четириесет и осумгодишната Аина Анамарија подигнала кредит за да купи кампер, за што плаќа месечна рата од 323 евра, што е околу половина од платата од 700 евра што ја зема за работа во продавницата. Изнајмувањето соба во стан на островот обично чини меѓу 400 и 500 евра, рече таа.
„Нема начин да се опише како треба да живееме на овој начин на нашиот сопствен остров“, додаде таа.
