Дел од катастарските и геодетските услуги за граѓаните поскапеа, а зголемувањето било направено поради се повисоките цени за електрична енергија, гориво, лиценци за софтвери, одржување на опрема и зголемување на платите кои се основа за пресметка на надоместокот.
-Сведоци сме на големото зголемување на цените на режиските трошоци (струја, гориво, лиценци за софтвери, одржување на опрема, плати и сл.) во изминативе неколку години. Цените пак, на услугите кои ги обезбедуваат геодетските друштва се непроменети изминативе 10 години (последниот Тарифник е донесен во 2014 година и цената на струја/ гориво и сл. е енормно зголемена од тогаш до денес). Примената на новиот Тарифник за геодетските друштва ќе значи изедначување на зголемените реални трошоци и цените кои друштвата ги наплаќаат за вршење на своите услуги (работа без загуби), а тоа ќе придонесе за испорачување на поквалитетна услуга кон крајните корисници, изјавија од Агенцијата за катастар.
За промена на сопственоста ќе бидат потребни три имотни листови кои ќе ги чинат по 1.250 денари плус 600 денари нотарски услуги или вкупно 4.350 денари. Досега при промена на сопственост во еден имотен лист се запишуваше квадратурата на станот и дел од заедничките простории вклучувајќи го и земјиштетото под зградата, сега ќе треба да се плаќа за секој имотен посебно.
„Цената на имотниот лист кој го издава Агенцијата за катастар на недвижности, а се однесува на имотот на граѓаните останува непроменет и тој изнесува, како и до сега 250 денари. Првиот упис на имот во Катастарот чини 1250 денари по имотен лист. Во претходниот Тарифник овој надоместок се наплаќаше по правен основ, односно поднесено барање и во еден правен основ можеше да се содржани неограничен број на имотни листови. Сегашниот надомест останува непроменет, но се однесува на еден имотен лист. Овој надоместок се наплаќа само при првиот упис и кога се менува сопственикот. Секое следно вадење имотен лист останува со цена од 250 денари“, појаснија од Катастар.
Ако новиот сопственик купува гаража, тоа ќе го чини дополнителни 1.250 денари.
За предбележување на имотен лист во фаза на градба, инвеститорот ќе плаќа по 5.250 денари по имотен лист, а бришење на предбележување чини поевтино, 2.625 денари.
Агенцијата за Катастар го објави новиот Тарифник, според кој поскапеа и геодетите.
Со овој тарифник се утврдува надоместокот за геодетско-катастарските услуги кои го наплаќаат трговците поединци овластени геодети и трговските друштва за геодетски работи на Република Северна Македонија, за да се испорача квалитетот на конкретната услуга и/или за да се изработи геодетски елаборат. Надоместоците дефинирани во Тарифникот обезбедуваат оптимални услови за извршување на геодетско-катастарските работи согласно со Законот за катастар на недвижности.
