Иранската влада планира да го зголеми воениот буџет за околу 200 отсто, изјави денеска портпаролката на иранската влада Фатемех Мохаџерани, пренесуваат иранските медиуми.
Одлуката е донесена откако Соединетите Држави го предупредија Иран во понеделникот во Советот за безбедност на Обединетите нации за „тешки последици“ доколку преземе какви било дополнителни агресивни дејствија против Израел или американскиот персонал на Блискиот Исток, пишува Middle East Online.
„Нема да се двоумиме да дејствуваме во самоодбрана. Нека нема забуна. САД не сакаат да видат понатамошна ескалација. Сметаме дека ова треба да биде крај на директната размена на оган меѓу Израел и Иран“, рекоа САД преку амбасадорката во ОН Линда Томас-Гринфилд.
Советот за безбедност се состана откако Израел нападна ракетни фабрики и други локации во Иран пред зори во саботата. Тоа беше како одмазда за нападот на Иран врз Израел на 1 октомври со околу 200 балистички ракети.
