„Со многу наши постоечки структури, деловни процеси и високи трошоци, ние веќе не сме конкурентни како брендот на Фолксваген“, ги предупреди вработените Томас Шефер, шефот на компанијата, за време на состанокот во седиштето на компанијата во Волфсбург во понеделникот. Ројтерс имаше можност да ја види објавата на интранетот на компанијата.
„Компанијата работи на подобрување на финансиските резултати на глобално популарната истоимена марка на автомобили“, рече нејзиниот портпарол. Процесот е особено важен бидејќи VW Group, матичната компанија, се префрла на производство на повеќе електрични автомобили.
Групацијата Фолксваген поседува неколку брендови, вклучувајќи ги Порше, Ауди и неговата оригинална марка Фолксваген, основана во 1937 година. Помеѓу марките на VW Group, вклучително и Skoda со седиште во Чешка и Seat со седиште во Шпанија, VW имаше убедливо најголем удел во продажбата, но исто така и најниски оперативни профитни маржи во текот на првите три месеци од оваа година, според корпоративната презентација.
Групацијата VW се надева дека ќе го зголеми приносот од продажбата на брендот VW од 3,6 отсто минатата година на 6,5 отсто до 2026 година, се вели во презентацијата пред инвеститорите. Во јавните презентации, VW рече дека се обидува да ги подобри перформансите на сите свои мејнстрим марки, меѓу другото, со подобра диференцијација меѓу нив, како и со намалување на потрошувачката, пишува tportal.
„Конечно треба да бидеме доволно храбри и искрени за да ги отфрлиме работите што се дуплираат во компанијата или едноставно се баласт што не ни требаат за добри резултати“, рече членот на Одборот за човечки ресурси Гунар Килијан. Компанијата, еден од најголемите светски производители на автомобили, е во средина на разговори со својот работнички совет за шемата за намалување на трошоците во VW, што е прв чекор во напорите на целата групација за зголемување на ефикасноста во транзицијата кон електрични автомобили.
