Во Германија стапија на сила нови правила во врска со визите за квалификувани работници од земјите надвор од Европската унија. Според новите правила, во таа земја може да се влезе и да се аплицира за работа до една година, под услов да се исполнат одредени критериуми.
Друг елемент од правилата што стапија на сила во Германија е проширувањето на прописите за државјаните на земјите од Западен Балкан, соопшти германското МВР.
Според ова правило, работниците од Србија, Босна и Херцеговина, Црна Гора, Северна Македонија, Албанија и на Косово сега можат полесно да одат во Германија на неопределено време, и тоа до 50.000 работници годишно, што е двојно повеќе од претходно, се наведува на веб-страницата на Министерството.
Новите правила, познати како „тикет за шанса“ за барање работа, се однесуваат на оние со најмалку двегодишно стручно образование или високо образование признаено во земјата каде што е стекната квалификацијата.
Потребно е и познавање на германски или англиски јазик.
Откако тикетот ќе биде одобрен, апликантот може да влезе во Германија и да бара работа до една година, што значи дека повеќе не мора да поднесува договор со германска компанија пред да му биде дозволено да влезе во Германија за да работи.
Како што е наведено, новите правила се воведени со цел да се намали бирократијата и да се скратат процедурите, а се дел од сеопфатниот закон чија цел е да се реши недостигот од квалификувана работна сила во Германија.
