Банката на Америка (BofA) ги зголеми своите прогнози за цената на бакарот, посочувајќи ги прекините во работата на дел од најголемите рудници во светот, но и зголемената побарувачка, бидејќи овој метал станува сѐ помалку достапен на глобалните пазари.
Според најновите проекции, цената на бакарот се очекува да достигне просек од 11.313 долари за тон во 2026 година, што е зголемување од 11% во однос на претходната проценка, и 13.501 долари во 2027 година, што е раст од 12,5%. Аналитичарите предвидуваат дека може да биде достигнат и плафон од 15.000 долари за тон.
Цените за третман и рафинирање на бакар нагло се намалија, што според Банката укажува на недостиг од оваа критична минерална суровина. Аналитичарите оценуваат дека клучниот проблем е ограниченото снабдување од рудниците. Дел од светските медиуми известуваат дека, и покрај овие пречки, побарувачката останува силна – пред сѐ поради потрошувачката во Кина (обнова на електромрежата), инвестициите во инфраструктура за вештачка интелигенција, како и првите знаци на закрепнување на европскиот пазар.
Дополнително, залихите на Лондонската берза за метали остануваат на ниско ниво, што го зголемува ризикот од уште поголем скок на цената. На почетокот на неделата, тримесечните фјучерси за бакар достигнаа 10.643 долари за тон. Интересот за овој метал расте и поради тоа што Европската Унија официјално го вклучи на листата на критични минерални суровини, неопходни за производство на електрични возила, соларни панели и ветерници, како и за модернизација на енергетските мрежи.
Брисел веќе ги олесни процедурите за производство на критичните минерали, а ист чекор направи и американската администрација, која најави олеснувања за домашно ископување и повисоки давачки за увоз. ЕУ истовремено отвори нов повик за стратешки рудници, кој ќе трае до јануари.
Во Македонија, новиот Закон за рударство, кој се очекува да влезе во собраниска процедура, предвидува признавање на стратешки рударски проекти и изготвување национална листа на критични минерали. Геолозите посочуваат дека источниот дел на земјата лежи на значителни количини бакар, но останува неизвесно дали државата ќе ги олесни процедурите и ќе ја искористи можноста.
Претходно неколку инвестиции во рудници за бакар пропаднаа, додека во моментов единствена сериозна инвестиција е онаа во Иловица, каде се проценува дека има 700 илјади тони бакар. Активен ископ постои уште само во Бучим и Боров дол, но нивните капацитети постепено се намалуваат.
