Американските санкции против Нафтната индустрија на Србија (НИС) ќе почнат да важат од 1 октомври, потврдија дипломатски извори. Одлуката е дел од пошироките мерки на Вашингтон насочени кон компании со тесни врски со Русија, а НИС е под контрола на руската енергетска корпорација „Гаспром њефт“.
Санкциите подразбираат ограничувања во работењето со меѓународни партнери, блокирање на потенцијални инвестиции и финансиски трансакции, како и намалена можност за пристап до одредени технологии и услуги. Според експертите, ова може значително да влијае врз енергетскиот сектор во Србија, особено во услови кога земјата се соочува со растечки предизвици на пазарот на нафта и гас.
Претседателот на Србија, Александар Вучиќ, даде изјава дека воведувањето на американските санкции кон Нафтна индустрија Србије (НИС), кои стапуваат на сила од 1 октомври, претставува сериозен удар за земјата и нејзиниот енергетски сектор.
„Тоа не е убава вест, но е очекувана. Ние сме тука колатерална штета на односите меѓу Американците и Русите, Западот и Русите, но висока цена ќе ја платиме ние. Бевме исклучително коректни и кон руските и кон американските партнери, но ќе платиме исклучително висока цена“, изјави Вучиќ за српските медиуми.
Тој нагласи дека Србија во наредниот период ќе се соочи со сериозни предизвици во обезбедувањето стабилно снабдување со енергенси, најавувајќи дека државата ќе бара алтернативни решенија за заштита на националните интереси.
Вашингтон ја оправдува одлуката со фактот дека санкциите се дел од стратегијата за ограничување на руското влијание во регионот, додека за Србија ова отвора сериозно прашање за идната насока на енергетската политика и геополитичките односи.
